To view this page ensure that Adobe Flash Player version 10.2.0 or greater is installed.

Нандин учрал

Зүрхэндээ чи намайг хайрлах байсан юм бол
Зүүдэнд минь яагаад ирээгүй юм бэ
Зуны зүсэр цагаан бороо нь ээ
Зулай норгоод шивэрч л байсан даа

Чи бидэн хоёрын учралыг
Цэцэгс найган дуулах л юм даа

Насаараа чи намайг хайрлах байсан юм бол
Нууцалж юундаа ичингүйрсэн юм бэ
Намрын зулзаган цагаан хус нь ээ
Навчисаа бүрэн гөвөөгүй л байсан даа

Чи бидэн хоёрын учралыг
Салхи исгэрэн дуулах л юм даа

Онцолж чи намайг хайрлах байсан юм бол
Оройтож юундаа ирсэн юм бэ
Будран хаялах цасан ширхэг нь ээ
Бударч гялалзаад шинэхэн л байсан даа

Чи бидэн хоёрын учралыг
Одод нэхэн дуулах л юм даа

Харцаараа чи намайг хайрлах байсан юм бол
Хайж яагаад ирээгүй юм бэ
Урин хаврын анхны яргуй нь ээ
Ургаж гүйцээд цэнхэртэж л байсан даа

Чи бидэн хоёрын учралыг
Саран хоноглон дуулах л юм даа
Одод нэхэн дуулах л юм даа

Facebook Twitter Google Plus