Зангаараа амраг

Зангуутай, сарнайтай хорвоо дээр 
Заяагаар учирсан амраг минь дээ 
Залуухан халуухан наснаасаа 
Зангаараа л яваа хань минь дээ 
Халгиатай, цалгиатай өдрүүдийг 
Ханиндаа л давсан даа хоёулаа 
Хайрах жавар салхинаас 
Халхалж л явлаа даа нэгнийгээ
 
  Дахилт
  Хасын сарны туяан дор 
  Хайртай гэж шивнэснийг чинь 
  Хангал согоо шиг насандаа 
  Хадмын бурханд сөгдөснийг чинь 
  Хайрт минь, хайрт минь хаанаас би мартах вэ?
 
Тэнгэртэй, газартай хорвоо дээр 
Тэвдэх баярлах минь олон чиг 
Тэтгэн түшдэг чамтайдаа л 
Тэнүүхэн, тэгшхэн явна даа 
Сэрүүхэн намар боллоо ч 
Сэтгэлийн минь наран мандаастай 
Сэмхэн хоёулаа бууралтлаа ч
Итгэлийн минь цэцэг ургаастай
 
  Дахилт
  Хасын сарны туяан дор 
  Хайртай гэж шивнэснийг чинь 
  Хангал согоо шиг насандаа 
  Хадмын бурханд сөгдөснийг чинь 
  Хайрт минь, хайрт минь хаанаас би мартах вэ?
Facebook Twitter Google Plus